Sunday, July 2, 2017

మనుసుల మాట 12.

                                                       

సరుకుల బండ్లకు రాజులు
సైనిక కాపలను యిచ్చి
సేవ పేరు తోటి పన్ను
సేఠ్ ల నుండూడ గొడితే

                                గూడ్స్ టాక్స్ పేర  నేడు
                                గుండు గుత్త పన్నంటూ
                                పన్ను పోటు ప్రజల పైన  
                                పస్తులున్న తప్పదాయే!

సరుకుల తయ్యారులోన
సర్వజనులు శ్రామికులే
సరుకులుగొను ప్రజలందరు
కట్టే పన్ను ప్రజల శ్రమే !

                                 బేపారికి కమీషను
                                 నౌకరిగాండ్లకు జీతాల్
                                 నాయకులెన్నికల ఫండ్
                                 శ్రమ జీవుల కస్టఫలమే !

తిన్న తిండి మీద పన్ను
పన్న పడక మీద పన్ను
పాలు దాగే పసి బిడ్డకు
పన్ను పోటు పొత్తిళ్ళు !

                                ప్రజల గోళ్ళు ఊడగొట్టి
                                పన్నులు వసూలు జేసె
                                పనే కదా సర్కారంటే
                                రాజైనా ప్రదానైనా చేసేది అదే పనే !

రాజ్యాంగం ప్రియాంబులు
పెద్ద పెద్ద లెక్చర్లూ
గద్దెల నెక్కేంత వరకే ,
ఎమ్మెన్ కంపిన్ల సేవే ఏకైక పరమార్థం !

                                 సంక్షేమపు రాజ్యమంటు
                                 ప్రజల కొరకే పాలననే
                                 మాటలన్ని బూటకాలే
                                 మనువాదపు నాటకాలే !

బుక్కెడంత బువ్వకొరకు
రెక్క బొక్కలిరుగుతుంటే
ఎక్కే దిగే విమానాలు
ఎవని సేవలోన వారు?

                                అడవులను తెగనరికి  
                                గుట్టబండ లిరిగేసి  
                                ఇసుక బొగ్గు మసి జేసి
                                నేల  నీరు గాలి కూడ అంగట్లో అమ్ముకొంటు !

సహజ వనరు సంపదంత
దర్జాగా అమ్ముకొంటూ
ప్రజల పైన పన్నెందని
ప్రశ్నించుడు తప్పెటులా ?

                                 కోట్ల కోట్ల సంపదంత
                                 కొల్లగొట్టినోళ్ల గొట్ట
                                 చేవలేని సర్కారుకు
                                 చేతైంది పన్నులేయ !

అధికారం, ప్రతిపక్షం
అందరు పన్నుల పక్షమే
అందుకే ఓ జనులారా
అడుగ రండి ముందుబడి !

                                రాజకీయ ముసుగులిడిచి
                                రండి కదలి ప్రజలంతా
                                ఎవరికొరకు ఈ పన్నులు
                                ఎదురు నిలిచి అడుగాలే !
                               
                                

                               

                                 

No comments:

Post a Comment